Heydər Əliyev Mərkəzində kitab təqdimatı
XX əsr dünya neft tarixinə qızıl hərflərlə yazılan «Əsrin müqaviləsi»nin imzalanmasından artıq 19 il ötür. 1994-cü il sentyabrın 20-də imzalanan bu saziş Azərbaycanın neft və yeni iqtisadiyyat tarixinin şanlı səhifəsini açmışdır. Ulu öndər Heydər Əliyevin reallaşdırdığı «Əsrin müqaviləsi» Xəzər dənizində beynəlxalq əməkdaşlığın əsasını qoyaraq, xarici sərmayədarların Azərbaycana axınını sürətləndirmişdir.
Azərbaycanın gələcək inkişafının təməli qoyan həmin gün münasibətilə 20 sentyabr 2013-cü il tarixində Heydər Əliyev Mərkəzində dünyada ilk özəl Miniatür Kitab Muzeyi tərəfindən azərbaycan və ingilis dillərində nəşr edilmiş “Heydər Əliyevin neft strategiyası” (“Heydar Aliyev’s oil strategy”) adlı kitabın təqdimat mərasimi keçirilmişdir. 38x53 mm ölçülü bu miniatür kitabın üz qabığı təbii dəridən hazırlanıb, qızılı naxışlarla bəzədilib. Qutuya eləcə də Moskvadakı “Monetnıy dvor”da qızıldan hazırlanmış medal da qoyulub. Medalın bir üzündə Heydər Əliyevin vaxtilə bəyəndiyi portreti, o biri üzündə dəfnə və zeytun budaqları ilə əhatələnmiş “90” rəqəmi, rəqəmin üstündə isə Azərbaycanın gerbi həkk olunub. Mərasimi giriş sözü ilə açan Muzeyin direktoru Zərifə xanım Salahova ümummilli lider Heydər Əliyevin Azərbaycan dövləti və xalqı üçün gördüyü əvəzsiz işlərdən danışmış, bu kitabın əhəmiyyətini qeyd etmişdir. Zərifə xanım Ulu öndərimiz Heydər Əliyevlə olan görüşlərindən danışmış və Heydər Əliyevin yaradıcı insanlara olan xüsusi rəğbət və qayğısından söz açmışdır.
Zərifə xanım bu tədbirin Heydər Əliyevin bacısı Rəfiqə Əliyevanın ad günü ilə eyni günə təsadüf etdiyini söyləmiş və tədbirdə iştirak edən Rəfiqə xanımı ad günü münasibətilə təbrik etmişdir. Kitabın təqdimatından sonra Ulu öndərə həsr edilmiş “Prezident olmaq” sənədli film nümayiş etdirilmişdir.
Tədbirdə dövlət təşkilatlarının nümayəndələri, Belorusiya və Özbəkistanın Azərbaycandakı fövqəladə və səlahiyyətli səfirləri, ictimaiyyət nümayəndələri, eyni zamanda “Əlillər Dünyası” qəzetinin təsisçisi və baş redaktoru Tahir Xudiyev iştirak etmişlər.
