PRESS_RELIZ
Bildiririk ki, “Beynəlxalq Əlillər Cəmiyyəti” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının layihəsi çərçivəsində 01 aprel 2014–cü il tarixindən “Əlil məhbuslar və onların ailə üzvlərinin sosial hüquqlarının təmin edilməsinə ictimai dəstək” adlı layihə həyata keçirir.
Layihənin əsas məqsədi Cəzaçəkmə Müəssisələrində cəzaçəkən əlil məhbusların və onların xüsusi qayğıya ehtiyacı olan ailə üzvlərinin həyatda rastlaşdıqları sosial problemlərinin araşdırılması və aidiyyəti dövlət təşkilatları vasitəsilə hüquqlarının təmin edilməsinə, eyni zamanda əlil məhbusların həbsdən azad olunduqdan sonra həyata adaptasiya etmələrinə dəstək olmaqdan, o cümlədən, bu istiqamətdə onlarla maarifləndirmə işi aparmaqdan ibarətdir.
3 aprel 2014-cü il tarixində “SƏS” İnformasiya Agentliyində layihənin təqdimatına həsr edilmiş Mətbuat Konfransı keçirilmişdir.
Mətbuat Konfransını giriş sözü ilə açan “Beynəlxalq Əlillər Cəmiyyəti” İctimai Birliyinin sədri Tahir Xudiyev lahiyənin məqsədindən, layihə çərçivəsində görüləçək işlərdən danışmış, əlil məhbusların özlərinin və onların qayğıya ehtiyac duyan ailə üzvlərinin sosial problemlərinin araşdırılıb onlara dəstək veriləcəyindən söz açmışdır.
Məlumat üçün bildiririk ki, Tahir Xudiyev hələ 2011-ci ildə əlil məhbusların özlərinin və onların ailə üzvlərinin sosial problemlərinin həlli ilə bir vətəndaş cəmiyətinin başçısı kimi özü şəxsən maraqlanmış, “Beynəlxalq Əlillər Cəmiyyəti” İctimai Birliyinin xətti ilə bu problemlərin müsbət həlli istiqamətində bir çox işlər görmüşdür.
2012-2013-cü ildə isə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yardımı ilə İctimai Birliyin həyata keçirdiyi “Cəzaçəkmə Müəssisələrində cəzaçəkən əlil məhbusların və onların himayəsindəki xüsusi qayğıya ehtiyacı olan ailə üzvlərinin sosial problemlərinin həllinə ictimai dəstək” adlı layihə Şura tərəfindən İlin Uğurlu Layihələri sırasında qiymətləndirilmişdir.
Builki layihə isə 2012-2013-cü ildə həyata keçirilən layihələrin davamı kimi əlil məhbusların və onların ailə üzvlərinin sosial problemlərinin həllinə yönəldilmişdir. Layihə zamanı eyni zamanda məhbəsdən çıxdıqdan sonra məhbusların sosial adaptasiyasına həsr ediləcək.
Mətbuat Konfransında çıxış edən Dövlət Sosial Müdafiə Fondunun şöbə müdiri Tural Mirzəyev, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının məsləhətçisi Elnur Bağırlı, Ailə, Qadın və Uşaq Problemləri üzrə Dövlət Komitəsinin əməkdaşı Raidə Əmirbəyova, Ombudsman Aparatının şöbə müdiri Vüqar Məhərrəmov bu layihənin əhəmiyyətindən danışmış, İctimai Birliyə uğurlar arzulamışlar.
Konfransda həmçinin Azərbaycandakı Qətər Səfirliyinin Attaşesi cənab Əli əs-Subei, KİV və QHT nümayəndələri də iştirak etmişlər.
“Beynəlxalq Əlillər Cəmiyyəti” İB-nin
Mətbuat xidməti
3 aprel, 2014-cü il