“Gələcəyini öz əllərinlə qur”
“Əlillər Dünyası” qəzetinin təsisçisi, “Beynəlxalq Əlillər Cəmiyyəti” İctimai Birliyinin sədri Tahir Xudiyev və İctimai Birliyin əməkdaşları bu yaxınlarda Acan xidmətin 3 saylı filialında və «Hyatt Recensy» Hotelin Kişmiş zalında fiziki qüsurlu uşaqların əl işlərindən ibarət təşkil edilmiş sərgilərdə olmuşlar.
Hər iki sərgi “Azərsun Holdinq” və “Bacarıqlı Əllər Dünyası” İctimai Birliyinin xüsusi qayğıya ehtiyacı olan və sağlamlıq imkanları məhdud olan uşaqların uşaq evlərində reabilitasiya proqramı əsasında “Gələcəyini öz əllərinlə qur” adlı layihəsi çərçivəsində təşkil edilmişdi. Uzun illər bu sahədə böyük təcrübəsi olan “Bacarıqlı Əllər Dünyası” İctimai Birliyinin sədri Azadə xanımın verdiyi məlumata görə, layihə çərçivəsində İB-in əməkdaşları Daun Sindromlu Şəxslərin Assosiasiyası, Uşaq Psixo -Nevroloji, 7 saylı Əqli və Fiziki Qüsurlu Uşaqlar üçün İnternat Evinin, 5 saylı Gözdən Əlillər Xüsusi İnternat Məktəbinin uşaqlarına xalçaçılıq, toxuma, lentlərlə iş və s. bu kimi əl işləri öyrədirlər. Sərgiyə gələnlər tərəfindən bu bacarıqlı uşaqların əl işləri böyük maraqla izlənmişdir. Tahir Xudiyev söylədi ki, bu sərgilər sözün əsil mənasında başqa sərgilərdən öz zənginliyi, rəngarəngliyi, qeyri-adiliyi ilə fərqlənirdi. Bu da Azadə xanımın böyük zəhməti və əziyyəti sayəsində ərsəyə gəlmişdir. Sərgidə “Azərsun Holdinq”in Humanitar şöbəsinin müdiri Rüfət Qasımov, Azərbaycan Respublikasının Prezidenti yanında Vətəndaşlara Xidmət və Sosial İnformasiyalar üzrə Dövlət Agentliyinin İnsan Resursları üzrə təlim şöbəsinin müdir müavini Cahangir Hacıyev, Abşeron Rayon İcra Hakimiyyəti və Nizami Rayon İcra Hakimiyyətinin, TUSİAB-ın, İsrail klinikasının nümayəndələri, həmçinin digər ictimaiyyət və KİV nümayəndələri də iştirak etmişlər.