“Beynəlxalq Əlillər Cəmiyyəti” İctimai Birliyi Fəxri Fərmanla təltif edildi
“Beynəlxalq Əlillər Cəmiyyəti” İctimai Birliyi
Fəxri Fərmanla təltif edildi
22 yanvar tarixində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası 2014-cü ildəki fəaliyyətinin nəticələrinə dair hesabat konfransı keçirmişdir.
Şura sədri, millət vəkili Azay Quliyev rəhbərlik etdiyi qurumun 2014-cü ildə fəaliyyətinin uğurlu olduğunu qeyd edərək, ötən il vətəndaş cəmiyyəti sahəsində aparılan islahatları müsbət qiymətləndirmişdir. Azay Quliyev 2014-cü ili Azərbaycanın QHT sektoru üçün şəffaflıq dövrü adlandırmışdır.
Konfransda çıxış edən Prezident Administrasiyasının İctimai-siyasi məsələlər şöbəsinin müdiri Əli Həsənov Şuranın Azərbaycan prezidentinin onun qarşısına qoyduğu vəzifələrin öhdəsindən layiqincə gəldiyini və bu gün vətəndaş cəmiyyətlərinin inkişaf dövrünü yaşadığını bildirdi. Əli Həsənov qeyd etdi ki, bu gün Azərbaycanda 3 minə yaxın QHT fəaliyyət göstərir.
Həyata keçirdikləri layihələrin icrasında fərqləndiklərinə görə 23 QHT Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının fəxri fərmanı ilə təltif edildi ki, onların arasında “Beynəlxalq Əlillər Cəmiyyəti" İctimai Birliyi də vardır. “Əlil məhbuslar və onların ailə üzvlərinin sosial hüquqlarının təmin edilməsinə dəstək” layihəsinin uğurla həyata keçirilməsinə görə Fəxri Fərmanı İctimai Birliyin sədri Tahir Xudiyevə Prezident Administrasiyasının İctimai-siyasi məsələlər şöbəsinin müdiri Əli Həsənov təqdim etmiş və gələcək fəaliyyətində uğurlar arzulamışdır.
Beynəlxalq Əlillər Cəmiyyəti" İctimai Birliyinin üzvləri, eləcə də “Əlil məhbuslar və onların ailə üzvlərinin sosial hüquqlarının təmin edilməsinə dəstək” layihəsinin iştirakçıları və layihədən faydalananlar Azərbaycan prezidentinə və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasına göstərdikləri qayğıya və dəstəyə görə təşəkkür edirlər.
Əlillər Dünyası qəzetindən
22 yanvar 2015-ci il