QHT-nin ilk çərşənbə münasibəti ilə tədbiri
QHT-nin ilk çərşənbə münasibəti ilə tədbiri
Novruz bayramının ilk çərşənbəsi münasibəti ilə 23 fevral 2016-cı il tarixində “Beynəlxalq Əlillər Cəmiyyəti” İctimai Birliyi əlil və imkansız şəxsləri və ailə üzvlərini sevindirmişdir. İctimai Birlik 200 nəfəri Beynəlxalq Muğam Mərkəzində keçirilən möhtəşəm Muğam konsertinə dəvət etmişdir. “Buta” instrumental ansanblının müşaiyəti ilə respublikada keçirilmiş Muğam Müsabiqələrinin laureatları Səbuhi İbayevin, Aytən Məhərrəmovanın, Ayşən Mehdiyevanın ifasında Azərbaycan xalq muğamları və mahnıları canlı səsləndirilmiş konsert yüksək səviyyədə keçmişdir.
Tədbirdə “Beynəlxalq Əlillər Cəmiyyəti” İctimai Birliyinin sədri Tahir Xudiyev və İdarə Heyətinin üzvü, 2-ci qrup Qarabağ müharibəsi əlili Mahir Əzizov, yazıçı-jurnalist, Azərbaycan Yazıçılar Birliyinin üzvü, 1-ci qrup əlil Rasim Gənzəli, Sarvan Əmrahov, Hacı İlham Məmmədzadə iştirak etmiş, konsertə gələn əlil və imkansız şəxsləri və onların ailə üzvlərini bayram münasibəti ilə şəxsən təbrik etmişlər.
Həmişə olduğu kimi “Beynəlxalq Əlillər Cəmiyyəti” İctimai Birliyi üzvlərinin asudə vaxtlarının səmərəli təşkil olunması üçün gələcəkdə də belə tədbirlərin keçirilməsini nəzərdə tutur.
“Əlillər Dünyası” qəzetindən
24.02.2016