Köhnə binaların harayı

Dəfələrlə köhnə eyvanların insanların başına uçub-tökülərək onların həyatına son qoyması mətbuatda işıqlandırılmışdır.

Nizami rayonu, Ş.Mirzəyev küçəsi - 34 ünvanında “Əlillər Dünyası” qəzeti və “Beynəlxalq Əlillər Cəmiyyəti” İctimai Birliyinin yerləşdiyi ofisin ikinci mərtəbəsindəki qonşu mənzilin eyvanı uzun müddətdir ki, çox təhlükəli, qəzalı bir vəiyyətdə idi. Bununla bağlı mənzil sahibi dəfələrlə aidiyyəti qurumları rəsmi və şifahi şəkildə məlumatlandırsa da, heç bir nəticəsi olmamışdır. Binanın yol kənarında, əhalinin çox gəlib-keçdiyi bir yerdə, hətta binanın 100 metrliyində  “Zəngi” liseyinin, Nizami Rayon Xalq Məhkəməsinin, Neft Şirkətinin İnsan Resursları Departamentinin və digər dövlət müəssisələrinin yerləşdiyini nəzərə alsaq,  bu köhnə binanın uçub-dağılmaqda olan eyvanının, oradan gəlib keçən şagirdlər, valideynlər və digər insanların həyatı üçün necə böyük bir təhlükə olduğunu təsəvvür etmək çətin deyil.

18 avqust 2014-cü il tarixində həmin köhnə binanın eyvanı nəhayət ki, uçub-dağıldı... xoş bir təsadüfdən yoldan keçənlərin başına uçmadı. Lakin hələ də asılıb qalan daş və dəmir parçaları hər an kiminsə həyatına son qoya bilər...

“Əlillər Dünyası” qəzetindən

19 avqust 2014-cü il