Bu yaxınlarda Almaniyanın Frankfurt şəhərində Asiya İnkişaf Bankı (AİB) Rəhbərlər Şurasının "Davamlı inkişaf naminə əməkdaşlıq" devizi altında 49-cu İllik Toplantısı keçirilmişdir. İllik Toplantıda AİB-ə üzv olan ölkələrdən nazirlər, mərkəzi bank rəhbərləri, yüksək vəzifəli dövlət və hökumət rəsmiləri, iş adamları, beynəlxalq maliyyə institutları və vətəndaş cəmiyyəti nümayəndələri və s. iştirakı edirdilər. Fest Hollda iştirakçılarla görüşən Almaniyanın Federal Kansleri xanım Anqela Merkel Toplantını açıq elan etmiş və işində uğurlar arzulamışdır.

Nəticələrə əsasən iqtisadi və sosial cəhətdən çox zəif olan ölkələrə yardımların, kreditlərin ayrılması nəzərdə tutulmuşdur.

İllik Toplantıda “Beynəlxalq Əlillər  Cəmiyyəti” İctimai Birliyinin sədri və “Əlillər Dünyası” qəzetinin təsisçisi Tahir Xudiyev və İB-in kordinatoru Fərhad Azayev də iştirak edirdilər. Əməkdaşlarımız AİB-nın Prezidenti Takehiko Nakao ilə görüşərək söhbətlər aparmışlar. Tahir Xudiyev bildirmişdir ki, İllik Toplantıda Almaniyadan və digər ölkələrdən olan sosial və təhsil sahəsində çalışan QHT rəhbərləri də iştirak edirdilər. Onlarla dostluq münasibətləri qurulmuşdur və gələcəkdə də bu istiqamətdə işlərin aparılması nəzərdə tutulur.

QHT əməkdaşları Toplantıda iştirak edən KİV nümayəndələri və digər ölkələrin səlahiyyətli nümayəndələri ilə görüşlər zamanı Azərbaycan həqiqətləri barədə danışmış, eləcə də Pakistan televiziyasına geniş müsahibə də vermişlər.

Asiya İnkişaf Bankı Rəhbərlər Şurasının 50-ci İllik Toplantısının 2017-ci ildə Yaponiyada keçirilməsi qərara alınmışdır.

“Əlillər Dünyası” qəzetindən,

10 may 2016-cı il