“Beynəlxalq Əlillər Cəmiyyəti” İctimai Birliyi layihə həyata keçirir
“Beynəlxalq Əlillər Cəmiyyəti” İctimai Birliyi
layihə həyata keçirir
Bu gün “Beynəlxalq Əlillər Cəmiyyəti” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının layihəsi çərçivəsində həyata keçirdiyi “İmtiyazlı məhbusların özlərinin və ailə üzvlərinin hüquq və azadlıqlarının müdafiəsi” adlı layihənin təqdimatını keçirdi.
İctimai Birliyin sədri Tahir Xudiyev bildirdi ki, həyata keçirlən layihənin əsas məqsədi imtiyazlı məhbusların özlərinin və onların ailə üzvlərinin hüquqlarının müdafiə olunmasından, həmçinin onların ailə üzvlərinin sosial problemlərinin həllinə nail olmaqla insan hüquq və azadlıqlarının qorunmasından ibarətdir. Tahir Xudiyev onu da qeyd etdi ki, məhbusların həyata adaptasiyasına hələ Cəzaçəkmə Müəssisələrindən başlamaq lazımdır, “İmtiyazlı məhbusların özlərinin və ailə üzvlərinin hüquq və azadlıqlarının müdafiəsi” layihəsini də bu sahədə Penitensiar Xidmətin işinə bir növ dəstək sayırıq. Belə ki, imtiyazlı məhbuslar həm CÇM-larda olarkən, həm də azadlığa çıxdıqdan sonra mənəvi dəstək gördükcə bir daha cinayət törətməməyə çalışırlar. Fikrimizcə, bunu da onların həyata adaptasiya olunmalarına, eləcə də hüquq-mühafizə orqanlarının da işinə kömək saymaq olar.
“SƏS” İnformasiya Agentliyində keçirlən tədbirdə çıxış edən Penitensiar Xidmətin Baş İdarəsi Tərbiyə İşinin Təşkili İdarəsinin inspektoru mayor Qaçay Musayev çıxışında 2011-ci ildən qarşılıqlı əməkdaşlıq edilən İctimai Birliyin imtiyazlı məhbuslarla apardıqları işi yüksək qiymətləndirmiş, bu layihənin həyata keçirilməsində də onlara uğurlar arzulamışdır.
Tədbirdə çıxış edənlər- “Erməni Təcavüzünün Tanıdılması” İB-in sədri, yazıçı-publisist, Qarabağ veteranı Səriyyə Cəfərova, İB-in hərbi işlər üzrə sədr müavini, 2-ci qrup Qarabağ əlili, təqaüddə olan polkovnik Nazir Hüseynov, İB-in hüquqşünası, Qarabağ veteranı, təqaüddə olan mayor Kamal Quliyev, AMEA-nın İnsan Hüquqları İnstitutunun direktor müavini Fizulu Kərimov və başqaları da bu layihənin mahiyyətinin böyüklüyündən, İB-in bu sahədə gördükləri işlərin vacibliyindən danışdılar.
“Əlillər Dünyası” qəzetindən,
17 may 2016-cı il
