Moskva Dövlət Humanitar İqtisad Universitetinin 25 illiyi
Bu günlərdə Moskva Dövlət Humanitar İqtisad Universitetinin 25 illiyi qeyd olundu. Bu Universitet MDB məkanında yeganə universitetdir ki, orada fiziki imkanları məhdud olan tələbələr üçün xüsusi şərait yaradılmışdır.
Heydər Əliyev Fondunun vitse-prezidenti Leyla Əliyeva bu münasibətlə Universitetdə keçirilən böyük tədbirdə iştirak etmişdir. Rektor Vaqif Bayramov Universitetdə fiziki imkanları məhdud olan tələbələrin rahat hərəkət etmələri və təhsil almaları üçün lazımi şəraitin olmasından danışdı. Vaqif müəllim Heydər Əliyev Fondunun vitse-prezidenti Leyla Əliyevanın 9 il əvvəl də Universitetin qonağı olmasından, Universitetin 20 illiyi munasibəti ilə o vaxt Leyla Əliyevanın təşəbbüsü ilə kompyuter otağının müasir texnologiyalarla təchiz olunmasından, linqvistika otağına yeni avadanlıqların hədiyyə edildiyindən danışdı. Vaqif Bayramov Azərbaycanla Rusiya arasında təhsil sahəsindəki xidmətlərinə və fiziki imkanları məhdud olan şəxslərin cəmiyyətə inteqrasiyasına verdiyi töhfəyə görə Moskva Dövlət Humanitar İqtisad Universitetinin fəxri professoru diplomunu Leyla Əliyevaya təqdim etdi.
Tədbirdən əvvəl Leyla Əliyeva Universitetin tələbə və müəllim kollektivi ilə görüşmüşdür. Həmin görüşdə rektor Vaqif Bayramov həmyerlimiz, “Beynəlxalq Əlillər Cəmiyyəti” İctimai Birliyinin üzvü, 2-ci qrup əlil, Universitetin 1-ci kurs tələbəsi Ümid Cümşüdovu xüsusi olaraq Leyla xanıma təqdim etmiş, Ümidin istedadlı bir tələbə olduğunu, gözəl əl işlərinin olmasını da qeyd etmişdir. Bu, xüsusi istedada malik olan Leyla xanımda böyük maraq və rəğbət hissi yaratmışdır.
Onu da bildirək ki, Ümidin bu Universitetdə təhsil almasında İctimai Birliyin böyük dəstəyi olmuşdur.
Tədbirdə Universitetin fəaliyyətini əks etdirən videoçarx nümayiş etdirilmiş, tələbələrin iştirakı ilə konsert verilmişdir.
“Əlillər Dünyası” qəzetindən,
21 may 2016-cı il