“Beynəlxalq Əlillər Cəmiyyəti” İctimai Birliyinin Mədəniyyət Şöbəsinin nəzdində Sayad Quliyevanın rəhbərliyi ilə “Xəzər ulduzları” adlı uşaqlardan ibarət rəqs dərnəyi fəaliyyət göstərir. “Xəzər ulduzları” İctimai Birliyin təşkil etdiyi və eləcə də digər tədbirlərdə böyük məharətlə öz rəqslərini nümayiş etdirirlər.

İyulun 26-da Sumqayıt şəhərində yerləşən N.Nərimanov adına Mədəniyyət Evində “Xəzər ulduzları” 8 illik yubileyini gözəl konsert proqramı ilə qeyd etdi. Tədbirdə uşaqlar milli rəqslərimizlə yanaşı dünya xalqlarının da rəqslərini böyük məharətlə, yüksək profesionallıqla ifa etdilər. Rəqslərin quruluşu gənc olmasına baxmayaraq, çox istedadlı xoreoqraf Kamil Ağazadəyə məxsusdur. Kamil Ağazadə özü də çıxışında bu işindən böyük zövq aldığını, bunun ona həyatda stimul verdiyini bildirdi. Kamil həm də gənc müğənni kimi gözəl səsə malikdir. Tədbirdə Kamil Ağazadə və digər gənc müğənnilər çıxış etdilər.

“Beynəlxalq Əlillər Cəmiyyəti” İB-in Novxanı Nümayəndəliyinin rəhbəri Lalə Abuzərova öz çıxışında “Xəzər ulduzları”na və Kamil Ağazadəyə uğurlar arzuladı, İB-in sədri Tahir Xudiyevə onları yenə də tək qoymayaraq verdiyi mənəvi dəstəyə görə, eləcə də imkansız və əlilliyi olan insanların özlərinə və ailə üzvlərinə  göstərdiyi daimi diqqət və qayğıya görə təşəkkürünü bildirdi.

İB-in sədri Tahir Xudiyev çıxışında bildirdi ki, etiraf etmək lazımdır ki, Kamil Ağazadə gözəl səsə malik gənc müğənni olmaqla yanaşı, istedadlı müəllim kimi əlilliyi olan və imkansız ailələrin uşaqlarından ibarət olan bu dərnəyin yüksək səviyyədə fəaliyyət göstərməsində böyük zəhmət çəkmişdir. Tahir Xudiyev bu yaxınlarda İB-in dəstəyi ilə “Xəzər ulduzları”nın xarici ölkədə festifalda iştirak edəcəyini də bildirdi. Bu, uşaqların və valideynlərin sevincinə səbəb oldu. Tahir Xudiyev həm də tədbir iştirakçılarına, xüsusilə də başda xeyirxah insan Xatirə Cabbarzadə olmaqla  tədbirdə çəkiliş aparan AMEA-nın “ElmTV” İnternet Televiziyasının əməkdaşlarına öz təşəkkürünü bildirdi.

Sonda “Xəzər ulduzları”na Kamil Ağazadənin hazırladığı diplom və fəxri fərmanlar təqdim edildi. Diplomları və fəxri fərmanları Tahir Xudiyev, Lalə Abuzərova, Sayad Quliyeva, İB–in hərbi işlər üzrə sədr müavini, ehtiyatda olan polkovnik Nazir Hüseynov, Sumqayıt şəhər Mədəniyyət Evinin direktoru Elnarə Rəşidova təqdim etdilər.

Tədbirdə valideynlər, ictimaiyyət və KİV nümayəndələri ilə yanaşı “Əlillər Dünyası” qəzetinin əməkdaşları da iştirak edirdilər.

Onu da qeyd edək ki, konsertdə Kamil Ağazadənin hazırladığı Azərbaycan folklar rəqsləri ilə bağlı film də nümayış etdirildi.

“Əlillər Dünyası” qəzetindən,

27.07.2016