“Beynəlxalq Əlillər Cəmiyyəti” İB Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yardımı ilə “Qaçqın, məcburi köçkün, müharibə veteranları, əlilliyi olan insanlar və məhbusların özlərinin və ailə üzvlərinin sosial problemlərinin həllinə ictimai dəstək” adlı layihə həyata keçirir. Layihənin məqsədi  qaçqın, məcburi köçkün, müharibə veteranları, Qarabağ əlilləri, bütün kateqoriyalı əlilliyi olan insanlar, məhbusların özlərinin və ailə üzvlərinin sosial problemlərinin öyrənilərək müsbət həllinə nail olmaqdan, bu istiqamətdə onlarla maarifləndirmə işləri aparmaqdan, həmçinin məhbusların hələ Cəza Çəkmə Müəssisələrindən başlayaraq həyata adaptasiya və reabilitasiyasına köməklik göstərməkdən ibarətdir.

Layihə çərçivəsində Hacı-Qabul rayonundan Qarabağ müharibəsi döyüşlərinin iştirakçısı Əddim Şükürov İctimai Birliyə məktubla müraciət etmişdir. Layihənin rəhbəri Tahir Xudiyev, layihədə könüllü iştirak edənlər-AMEA-nın Hüquq və İnsan Haqları İnstitutunun direktor müavini Füzuli Kərimov və İB-in üzvü Əliyəddin Abbasov may ayının 30-da  Hacı-Qabul rayonunda Əddim Şükürovun ailəsidə olmuş, problemləri ilə yerindəcə maraqlanmışlar.

Əddim Şükürov bildirmişdir ki, onun 1979-cu il təvəllüdlü oğlu Vüsal Şükürov həqiqi hərbi xidməti başa vurub qayıtdıqdan sonra açıq yaralı vərəm xəstəliyinə tutulmuşdur. 2016-cı ildə Şirvan Şəhər Xəstəxanasında 8 ay müalicə olunmuş, hazırda da müalicəsi davam edir. Öz hüquqlarını bilməyən Vüsal Şükürov Elmi-Tədqiqat Ağciyər Xəstəlikləri İnstitutundan xəstəliyi ilə bağlı rəy alınması işində çətinlik çəkdiyi üçün bu işdə köməklik göstərməyi İctimai Birlikdən xahiş etmişdir.

  Onu da qeyd edək ki, Əddim Şükürov özü təqaüdçüdür, heç yerdə işləmir.

İyun ayının 2-də layihənin rəhbəri T.Xudiyev,  layihədə könüllü iştirak edənlər- İB-in Qarabağ üzrə koordinatoru, müharibə veteranı Əliyəddin Abbasov və İB-in üzvü, 2-ci qrup əlil Həsən Quliyev Vüsal Şükürovla birgə Ağ Ciyər Xəstəlikləri İnstitutunda olmuş, Baş həkim İmamverdi Rzayevlə görüşmüşlər. Onlar bildirmişlər ki, ilk baxışdan Ag Ciyər Xəstəlikləri İnstitutunda baş vermiş müsbət dəyişikliklər, nizam-intizam onlara xoş təsir bağışlamışdır. Baş həkim İmamverdi Rzayevlə görüşdən sonra onun əvvəllər Daxili Qoşunların Hospitalında Baş cərrah, sonra Hospitalın Tibb xidməti rəisi vəzifəsində işlədiyi məlum olmuşdur. İnstitutda gördükləri bu dəyişikliklərin əsil həbrçi qayda-qanununu, nizam-intizamını xatırlatmasının hardan qaynaqlanması bəlli olub. 

   Xəstə Vüsal Şükürov xəstəliyə həqiqi hərbi xidmət keçdiyi zaman yoluxduğu üçün vaxtından əvvəl ordudan tərxis olunması, sonra 8 ay Şirvan Şəhər Xəstəxanasında müalicə alması barədə sənədləri Baş həkimə təqdim etmişdir. Müayinədən sonra Baş həkim 8 ay müalicə almasına baxmayaraq Vüsalın səhhətində heç bir müsbət dəyişikliklərin olmadığını bildirdikdə Vüsal Şirvan Şəhər Xəstəxanasınının vərəm şöbəsinin antisanitar, təsəvvür edilməyən dərəcədə çox acınacaqlı bir vəziyyətdə olduğunu söyləmişdir. Baş həkim bundan çox təəssüf hissi keçirdiyini və səhiyyə nazirinə bu barədə tezliklə məruzə edəcəyini bildirmişdir.

        Ag Ciyər Xəstəlikləri İnstitutunda xüsusi tibbi komissiyadan keçdikdən sonra Vüsal Şükürova xəstəliyi ilə əlaqədar illərlə ala bilmədiyi tibbi rəy verilmişdir.   

     Vüsal Şükürov yaxın qohumu Qədir Qədirovla birgə İctimai Birliyin ofisində olmuş illərlə üzləşdiyi problemi tez bir zamanda həll etdiyi üçün “Beynəlxalq Əlillər Cəmiyyəti”nin əməkdaşlarına təşəkkürünü bildirmişdir.  

Məlahət Abdullayeva,

“Əlillər Dünyası” qəzetindən

02.06.2017