“Beynəlxalq Əlillər Cəmiyyəti” İB növbəti layihəsini başa çatdırdı
Məlumat verdiyimiz kimi “Beynəlxalq Əlillər Cəmiyyəti” İB Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yardımı ilə “Qaçqın, məcburi köçkün, müharibə veteranları, əlilliyi olan insanlar və məhbusların özlərinin və ailə üzvlərinin sosial problemlərinin həllinə ictimai dəstək” adlı layihə icra edirdi.
Bu gün İctimai Birliyin qarşılıqlı əməkdaşlıq etdiyi AMEA Hüquq və İnsan Haqları İnstitutunda təşkil edilən Mətbuat Konfransı həm layihənin yekun hesabatına, həm də layihə çərçivəsində hazırlanmış “İmtiyazlı vətəndaşlar üçün qanunlar toplusu” adlı elektron kitabın təqdimatına həsr edilmişdi. Tədbiri giriş sözü ilə açan İnstitutun elmi işlər üzrə direktor müavini, professor Lalə Əhmədova HİHİ-nun direktoru, hüquq elmləri doktoru, millət vəkili Aytən Mustafayevanın adından tədbir iştirakçılarını salamlamış və İnstitutun və qarşıqlı əməkdaşlıq etdikləri “Beynəlxalq Əlillər Cəmiyyəti”nin insanların hüquq və azadlıqları yolunda gördükləri işlərin təqdirəlayiq olmasından danışdı, eləcə də İctimai Birliklə əməkdaşlıq çərçivəsində əvvəllər də həyata keçirilən əməli tədbirləri nəzərə çatdırdı.
3 ay davam edən layihə ərzində həmin kateqoriyadan olan 10-larla şəxslərin sosial problemləri öyrənilərək müsbət həllinə nail olunmuş, bu istiqamətdə onlarla maarifləndirmə işləri aparılmış, həmçinin məhbusların hələ Cəza Çəkmə Müəssisələrindən başlayaraq həyata adaptasiya və reabilitasiyasına köməklik göstərilmişdir. Bu barədə bu gün keçirilən Mətbuat Konfransında “Beynəlxalq Əlillər Cəmiyyəti” İB-in sədri və layihənin rəhbəri Tahir Xudiyev məlumat verdi. Tahir Xuduyev onu da əlavə etdi ki, təqdim olunan “İmtiyazlı vətəndaşlar üçün qanunlar toplusu” kitabı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maillyə dəstəyi ilə həyata keçrilən layihə zamanı elektron variantda hazırlanmışdır. Bundan əlavə, həm də İB-in Hüquqi işlər üzrə təlimatçısı, Ədliyyə müşaviri Fərman Rzayevin xeyriyyəçiliyi ilə isə layihədən kənar olaraq nəşr edilib. Kitab hər iki variantda tədbir iştirakçılarına təqdim edildi.
Çıxış edənlər- Ombudsman Aparatının Elmi-analitik sektorunun müdiri Mahir Məmmədov, AMEA HİHİ-nin Dövlət və konstitusiya hüququ şöbəsinin müdiri, hüquq elmləri doktoru Ayxan Rüstəmzadə, tibb elmləri fəlsəfə doktoru Aynur Qəhrəmanova, “Həsrət Yolu” ƏGKİB-n sədri, AMEA HİHİ-nin böyük elmi işçisi Esmira Orucova, “İdeal Sülhün Təbliği Fondu”nun sədri Hacı Əlikram Müzəffər, ADU-nin professoru, BİSTF-nin vitse-prezidenti Məhəmməd Teymurlu, “Bacarıqlı Əllər Dünyası” İB-in sədri Azadə Məmmədova, ETTİB-im sədri Səriyyə Müslümova, Qarabağ müharibəsi veteranı, Şuşadan məcburi köçkün Umudvar Məmmədli yeni nəşrin bəzi vətəndaşlar üçün öz hüquq və vəzifələrini öyrənməsi baxımından çox əhəmiyyətli olmasından, həmçinin “Beynəlxalq Əlillər Cəmiyyəti” İB-in bu istiqamətdə gördüyü dəyərli işlərdən danışmışlar. Bu baxımdan “Beynəlxalq Əlillər Cəmiyyəti” İctimai Birliyinin təşəbbüsü ilə Azərbaycan Respublikasının qanunvericilik aktlarının təbliği ilə bağlı olan hər bir yeni nəşrlərin hazırlanması və geniş ictimaiyyətə tədqim olunması xüsusi ilə diqqətə layiqdir.
Tədbirdə İB tərəfindən köməklik göstərilən bir neçə imtiyazlı şəxslər də iştirak edirdi. Onlar İctimai Birlik tərəfindən nəinki layihə zamanı, eləcə də layihədən kənar vaxtlarda da köməyə ehtiyacı olan insanlara daima dəstək göstərildiyinin, ictimai vəkillik edilərək hüquqlarının müdafiə edilməsinin şahidi olduqlarını söylədilər. Həmçinin yenicə azadlığa çıxmış keçmiş məhbus söylədi ki, “İB-in sədri Tahir Xudiyev mən həbsdə olduğum müddətdə qanunvericiliklərə istinad edərək daima mənim savadsız ailəmə, eləcə də həbsdən azad olunduqdan sonra mənim özümə böyük köməklik göstərmişdir”.
Tədbirdə “Beynəlxalq Əlillər Cəmiyyəti” İctimai Birliyinin sədri və 2003-cü ildən fəaliyyət göstərən “Əlillər Dünyası” qəzetinin təsisçisi və Baş redaktoru Tahir Xudiyevə qəzetin adına və məqsədinə uyğun əməli fəaliyyətinə görə Azərbaycan Kütləvi İnformasiya Vasitələri İşçiləri Həmkarlar İttifaqı tərəfindən “Qızıl Qələm” media mükafatı da təqdim olundu.
Həmçinin “Beynəlxalq Əlillər Cəmiyyəti”nin əlilliyi olan üzvlərinin əl işlərinin satış-sərgisi də təşkil edilmişdi.
14 iyul 2017-ci il
Mətbuat xidməti