Erməni ordusu dinc əhalini öldürməkdə davam edir
Bu gün "Beynəlxalq Əlillər Cəmiyyəti" İB-in Tərtər şəhərində yərləşən Qarabağ regionu üzrə nümayəndəliyinin rəhbəri, "Əlillər Dünyası" qəzetinin xüsusi müxbiri, Qarabağ veteranı, təqaüddə olan polis veteranı Həsənağa Bayramov cəbhədə ordumuzun üstünlüyü ilə gərgin döyüşlərin getdiyini bildirmişdir. Onun verdiyi məlumata əsasən Ermənistan ordusu humanitar müvəqqəti atəşkəş rejimini pozmaqda davam edir, bütün Qarabağ sərhəd boyu ağır artilleriyadan atəş açaraq böyük dağıntılara, dinc əhalinin ölümünə səbəb olurlar. 15 oktyabr tarixində qəbristanlıqda Tərtər şəhər sakini Rəfiqə Məmmədovanı dəfn edərkən ermənilərin atdığı mərmilər düz qəbristanlığa düşmüş, nəticədə 4 nəfər ölmüş, 4 nəfər isə ağır yaralanmışdır. Yaxınlıqdakı avtomobillərə ziyan dəymişdir. Həlak olanlardan ikisi İsgəndər Əmirov mərhumənin kürəkəni, digəri isə onun yeznəsidir. Bir nəfər isə "Beynəlxalq Əlillər Cəmiyyəti" İB-in Tərtər şəhərində yaşayan fəal üzvü, məcburi köçkün, təqaüddə olan polis veteranı, 2-ci qrup Qarabağ əlili Əliş Cümşüdoğlunun yaxın qohumu Rüstəmov Vasif Bahadur oğludur. Yaralananlar bildiriblər ki, qəbristanlıq yüksək ərazidə yerləşdiyindən ermənilər təçili yardım maşınını görüblər və qəsdən, bilərəkdən onlara atəş açıblar. Həsənağa Bayramov onu da bildirdi ki, ağır döyüşlərin getməsinə baxmayaraq yerli əhali evlərini tərk etmir, heç kim ruhdan düşməyib. Hamı "Qarabağ bizimdir"! şüarı ilə Azərbaycanın bu haqq işində Ali Baş Komandanımızın rəhbərliyi ilə torpaqlarımızı düşməndən azad edən qəhrəman ordumuzun yanındadır.
Məlahət Abdullayeva
"Əlillər Dünyası" qəzetindən
16.10.2020