Ədliyyə Nazirliyi İcra Baş İdarəsində özbaşınalıq o dərəcədə baş alıb gedir ki, əlilliyi olan xəstə insanlara qarşı dələduzluq edən biri barəsində məhkəmə qərarına əhəmiyyət verilmir, 12 ildir ki, icra edilmir. Amma özlərinin maraq dairəsində olanda hər hansı bir banka 5 manat borcu olan yetimi, əlili başına döyə-döyə -məhkəmə qərarıdır- deyib evlərindən bayıra atırlar. Belə sual çıxır meydana - bəs əlilliyi olan insanları aldadan bir dələduza himayədarlıq edərək barəsində olan məhkəmə qararını icra etməməkdə bunların maddi maraqları nədir?! Onlara yaxşı məlumdur ki, bu dələduz 12 ildir ki, xarici ölkədə gizlənir.

İcraçıların gözlərini pərdə o qədər tutub ki, Daxili İşlər Nazirliyini günahkar çıxardırlar. Biz məhkəmə icraçıları ilə danışan zaman DİN-ni günahkar çıxardırlar ki, bu dələduzu onlar axtarmalıdırlar. Öz üzərlərinə düşən vəzifələri, öhdəlikləri yerinə yetirməyərək polisin üzərinə yönəldirlər. Halbuku bu mülki məsələ olduğundan özləri məhkəmə qararını icra etməlidirlər.  DİN-nin bu dələduzla bağlı ölçü götürməsi üçün  məhkəmə icraçıları 1-2 il ərzində istəsəydilər özləri daxili qərar çıxardıb sənədləri təqdim edərək DİN qarşısında vəsadət qaldıraraq həmin dələduz haqqında xinayət işi açdıra bilərdilər. DİN 12 ildir ki, öz səlahiyyətləri daxilində pasport qeydiyyat axtarışına verib. Bununla da heç bir iş görmək mümkün deyil.

Hansısa bir dövlət qurumuna tərəfkeşlik edib digərini günahkar çıxarmaq istəmirik. Biz uzun illərdir ki, Ədliyyə Nazirliyi ilə rəsmi əməkdaşlıq edirik. Lakin bu o demək deyil ki, biz məhkəmə icraçılarının ədalətsiz, haqsız işinə göz yummalıyıq.

Artıq sağlamlığımız imkan vermir ki, bu işin ardınca gedək. Açıq-aydın görünür ki, 12 ildir ki, bu dələduzu dəstəkləyən hansısa bir qüvvə var. Bu məsələni  ictimailəşdirməkdən başqa bir əlacımız qalmayıb. İctimaiyyətdən və kütləvi informasiya vasitələrindən dəstək istəyirik, öz səhifələrində işıqlandırsınlar. Haqq nazilər, amma üzülməz. Ümidimizi Allahdan üzmürük, yəqin ki, nə vaxtsa  haqq-ədalət yerini tapar. 

Biz əlilliyi olan insanları küçələrə çıxardaraq piket yolu ilə  yox, sivil yolla hüquqlarımızı tələb edirik.

“Əlillər Dünyası” qəzetindən

27.07.2021