Hər il zilhiccə ayının 18-də İslam aləminin böyük bayramlarından biri Qədir-Xum bayramı qeyd olunur. Həmin gün Məhəmməd peyğəmbər (s) Əli ibn Əbu Talibi canişin təyin etməsi kimi böyük bir tarixi hadisə baş verib. Vaxtı ilə xəlifələr siyasi səbəblər üzündən bu böyük tarixi hadisəni xatirələrdən silmək istəsələr də, göründüyü kimi bu tarix heç vaxt insanların yaddaşından silinməyəcək. Hətta həmin gün Məhəmməd Peyğəmbər (s.ə.v) mühacir və ənsara, hətta öz həyat yoldaşlarına belə göstəriş vermişdi ki, Əlinin (ə) hüzuruna gedərək imamət və vilayətinə görə onu təbrik etsinlər.

Üç ildir ki, hər il iyul ayının 29-u görkəmli din xadimi Hacı Seyid Mir Taha Ağanın anım günü kimi qeyd edilir. 1934-cü ildə Yardımlı rayonunun Perimbel kəndində anadan olmuş Hacı Mir Taha Zəkiyev IV İmam Zeynalabddinin nəslinin layiqli davamçılarından, cənub zonasının sayılıb-seçilən şəxsiyyətlərindən idi. Cənub bölgəsində çox məşhur din xadimi sayılan Axund Molla Hüseyndən dərs alan, ömrünün 60 ilini İslam dininin, müqəddəs kitabımız Quranın təbliğinə həsr edən İslam dini üzrə alim, ərəb və fars dillərini mükəmməl bilən Hacı Mir Taha dayının yüzlərlə tələbəsi olub.

Xalqımızın dini təfəkkür tarixində istedadı, ağlı, zəkası, yüksək  şəxsi keyfiyyətləri ilə silinməz izlər qoymuş Hacı Seyid Mir Taha Ağanın xatirəsi hər bir insan üçün doğma və əzizdir.

Bu il Hacı Mir Taha Ağanın anım günü İslam aləminin müqəddəs Qədir-Xum bayramı ilə eyni günə təsadüf edir.

“Beynəlxalq Əlillər Cəmiyyəti” İB və “Əlillər Dünyası” qəzeti kollektivi adından Müqəsddəs Qədir-Xum bayramı münasibəti ilə bütün müsəlmanları təbrik edirik.

Hacı Mir Taha Ağaya Allahdan rəhmət diləyir, ruhu şad olsun-deyirik. Allah başda Mir Vəli Zəkiyev olmaqla Hacı Mir Taha Ağanın ocağında yurdçu olanların hamısına cansağlığı versin.

Tahir Xudiyev

“Əlillər Dünyası” qəzetindən

29.07.2021