Nisəxanım Mirişli
“Beynəlxalq Əlillər Dünyası” İctimai Birliyinin İdarə Heyəti və “Əlillər Dünyası” qəzetinin Redaksiya Heyətinin üzvü, akademik Nisəxanım Mirişli ömrünün 79-cu ilində dünyasını dəyişdi.
Nisə xanım Məmməd qızı Mirişli 1932-ci ildə Bakı şəhərində ziyalı ailəsində anadan olmuşdu. Atası Məmməd kişi dəmir yolu mühəndisi, anası tibb işçisi idi. Nisə xanım orta təhsilini Bakı şəhəri 132 nömrəli məktəbdə almışdı. 1956-ci ildə N.Nərimanov adına Tibb İnstitutunun müalicə-profilaktika fakültəsini bitirir. 1962-ci ildə Azərbaycanda ilk dəfə olaraq Mirişli N.M. tərəfindən kəskin və xroniki kolitlər zamanı bağırsaq mikroflorası öyrənilib və onun korreksiyası metodu tətbiq olunub, bu üsullar indi də öz aktuallığını itirməyib. Sonrakı illərdə Mirişli N.M. xroniki B virus hepatitinin Bakı şəhərinin iri sənaye müəssisələrində yayılması yollarını öyrənib və infeksiyanın profilaktikasının kompleks tədbirlər sistemini hazırlayaraq tətbiq edib.
Respublikanın əməkdar həkimi, tibb elmləri doktoru, professor Nisəxanım Mirişli 1975-ci ildən Əziz Əliyev adına Azərbaycan Dövlət Həkimləri Təkmilləşdirmə İnstitutunun Yoluxucu xəstəliklər kafedrasına rəhbərlik edib. Ekologiya və həyat fəaliyyəti təhlükəsizliyi elmləri Beynəlxalq Akademiyasının akademiki idi.
2004-cü ildən “Əlillər Dünyası” qəzetinin Redaksiya Heyətinin, 2008-ci ildən isə “Beynəlxalq Əlillər Dünyası” İctimai Birliyinin İdarə Heyətinin üzvü idi.
“Beynəlxalq Əlillər Dünyası” İctimai Birliyinin kollektivi və sədri Tahir Xudiyev İB-in İdarə Heyətinin üzvü Nisəxanım Mirişlinin vəfatından kədərləndiyini bildirir və ailəsinə dərin hüznlə başsağlığı verirlər.
Allah rəhmət eləsin!