İyunun 26-da qardaş Türkiyədə Uluslararası İpekyolu Dərgisinin 17-ci "İpekyolu İlin Altın Adamları Ödül Töreni” keçirilib. Müxtəlif nominasiyalar üzrə keçirilən ənənəvi mükafatlandırma mərasimində 10-dan çox Türk dünyasının müxtəlif bölgələrindən gəlmiş bir çox tanınmış şəxsiyyətlər  iştirak edirdi.

“Türk Dünyası Turan Düşüncə Mərkəzi” İB–in və “Beynəlxalq Əlillər Cəmiyyəti” İB-in İdarə Heyəti üzvü, hər iki təşkilatın Türkiyə üzrə nümayəndəliyinin rəhbəri Furqan Babayev həmin mərasimdə “İlin Gənc İş Adamı” kimi yüksək mükafata layiq görüldü. Bu münasibətlə Furqan Babayevi təbrik edir, hər bir işində müvəffəqiyyətlər arzulayırıq. Bu, Azərbaycanın fəxridir.

Mükafatlandırılanlar sırasında Özbəkistan və Qazaxstanın Türkiyədəki böyük elçiləri, Makedoniyadan, Qaqauz elindən, Rumıniyadan olan millət vəkilləri və iş adamları ilə yanaşı Azərbaycan Respublikasının Diasporla İş üzrə Dövlət Komitəsinin sədri Fuad Muradov, Xalq şairi, millət vəkili Sabir Rüstəmxanlı da var idi. “Azərbaycan-Türkiyə Evi”nin sədri Tənzilə Rüstəmxanlı da iştirakçılar sırasında Azərbaycanı təmsil edirdi.

Onu da qeyd edək ki, hər bir zaman Azərbaycanın yanında olan, kədərinə kədərlənib, böyük zəfərinə sevinən qardaş Türkiyədə 03.07.2021-ci il tarixində saat 13.00-da “İpekyolu Komu Diplomasisi ve  Ekonomik İşbirliği Teşkilatı”nın Başkanı Dr. Seyfullah Türksoyun təşkilatçılığı ilə Qarabağın düşməndən azad olunması münasibətilə “Karabağ zafarini kutlama ve Harı Bülbül Kardeşlik Şöleni” adlı böyük tədbir keçiriləcək. Bunun üçün Türk Dünyasıyla könül köprüləri quran Dr. Seyfullah Türksoya təşəkkür edir və hər bir işində bundan sonra da uğurlar arzulayırıq.

Tahir Xudiyev

"Əlillər Dünyası" qəzetindən     

02.07.2021