"Beynəlxalq Əlillər Cəmiyyəti" İB 01.05.2018 - 01.09.2018-ci il tarixləri ərzində Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə yardımı ilə "Qaçqın, məcburi köçkün, müharibə veteranları, əlil və sağlamlıq imkanları məhdud olan şəxslərin, məhbusların və ailə üzvlərinin problemlərinin həllinə dəstək" adlı layihə həyata keçirir.  Bu gün qarşılıqlı əməkdaşlıq etdiyimiz AMEA Hüquq və İnsan Haqları İnstitutunda layihənin təqdimatına həsr edilmiş tədbir keçirildi.

            Layihənin rəhbəri və İctimai Birliyin sədri Tahir Xudiyev öncə bu gün Laçın rayonunun ermənilər tərəfindən işğalından 26 il ötməsini təəssüflə qeyd etdi və bütün şəhidlərimizin xatirəsi tədbir iştirakçıları tərəfindən bir dəqiqəlik sükutla yad edildi.

            Sonra Tahir Xudiyev sözünə davam edərək həyata keçirilən layihənin icrası zamanı qaçqın, məcburi köçkün, müharibə veteranları, əlil və sağlamlıq imkanları məhdud olan şəxslərin, eləcə də məhbusların özlərinin və ailə üzvlərinin tibbi-sosial, hüquqi, psixoloji problemlərinin öyrənilərək həllinə nail olunacağını, bu istiqamətdə onlarla maarifləndirmə işləri aparılacağını, həmçinin məhbusların hələ Cəza Çəkmə Müəssisələrindən başlayaraq həyata adaptasiyasına və reabilitasiyasına köməklik göstəriləcəyini söylədi.

İctimai Birliyin İdarə Heyəti üzvü, AMEA Mərkəzi Elmi Kitabxananın direktoru, tibb üzrə fəlsəfə doktoru Leyla İmanova öz çıxışında layihənin sonunda həmin kateqoriyalı insanların həyata adaptasiyası və reabilitasiyası ilə bağlı əlavə təkliflərin  hazırlanaraq aidiyyəti dövlət qurumlarına təqdim ediləcəyini bildirdi.

Çıxış edənlər-"Beynəlxalq Əlillər Cəmiyyəti" İB-in Sədr müavini, AMEA Fəlsəfə İnstitutunun aparıcı elmi işçisi, fəlsəfə elmləri doktoru, "Qabaqcıl maarif xadimi" Mir Müstəqil Ağayev, İB-in Ağsaqqallar Şurasının üzvü, filologiya elmləri doktoru, “Qızıl Qələm” mükafatı laureatı, metodist-müəllim İmaməddin Zəkiyev, İB-in Baş Hüquq məsləhətçisi və ədliyyə müşaviri Fərman Rzayev, Ombudsman Aparatı Hüquqi Maarifləndirmə Sektorunun müdiri Müqalib Mahmudov, Dini Qurumlarla İş üzrə Dövlət Komitəsinin əməkdaşı Tural Malik Vəlizadə, Ailə, Qadın Uşaq Problemləri üzrə Dövlət Komitəsinin əməkdaşı Əsmər Musayeva, Mədəniyyət Nazirliyinin əməkdaşı Pərvanə Abdullayeva, Ədliyyə Nazirliyinin əməkdaşı Liza Xanməmmədova, Fövqəladə Hallar Nazirliyinin əməkdaşı Azadi Quliyev, Bakı Şəhəri üzrə Təhsil İdarəsi Təlimə Dəstək Mərkəzinin psixoloqu Səidə Musayeva, "Erməni Təcavüzünün Tanıdılması" İB-in sədri Səriyyə Cəfərova, Hüquq və İnsan Haqları İnstitutunun əməkdaşı Nigar Ağakişiyeva, "Beynəlmiləlçi Əlil Döyüşçülər" Fondunun prezidenti Sərraf Orucov, "Həkəri" qəzetinin şöbə müdiri Arzu İlyasqızı, "Beynəlxalq İdeal Sülhün Təbliği" Fondunun prezidenti Arzu Hüseynova imtiyazlı vətəndaşların sosial problemlərinin həlli yolunda həyata keçirilən bu layihənin vacibliyindən danışmış və layihənin icraçılarına uğurlar diləmişlər.

İctimai Birliyin Ağsaqqallar Şurasının üzvü, Azərbaycan Dillər Universitetinin professoru Məhəmməd Teymurlu "Beynəlxalq Əlillər Cəmiyyəti" İB-in ötən il nəşr etdirdiyi "İmtiyazlı vətəndaşlar üçün qanunlar toplusu" adlı kitabın öz hüquqlarını öyrənmələri yolunda vətəndaşlar üçün çox lazımlı bir vəsait olduğunu vurğulamış və İB-in vətəndaşların maarifləndirilməsi yolunda gördüyü işləri yüksək qiymətləndirmişdir.

  Stavropol vətəndaşı, "Stavstroy" BTŞ-nin direktor müavini Xatirə Mehdiyeva çıxış edərək Azərbaycan həqiqətlərinin xarici ölkələrdə yayılmasının tərəfdarı olduğunu bildirmiş və  bu istiqamətdə "Beynəlxalq Əlillər Cəmiyyəti " İB ilə əməkdaşlıq təklif etmişdir.

Tədbirin sonunda Laçın rayonundan məcburi köçkün, şəhid anası Sevda Kərimova çıxış edərək nəvəsi 1-ci qrup gözdən əlil Nurlananın sosial probleminin həllinə köməklik göstərilməsi üçün "Beynəlxalq Əlillər Cəmiyyəti" İB-yə müraciət etdi.

            Tədbirdə M.F.Axundov adına Milli Kitabxananın və digər dövlət təşkilatlarının, eləcə də QHT, KİV, ictimaiyyət nümayəndələri də iştirak edirdilər.

           Məlahət Abdullayeva

            18.05.2018