"Beynəlxalq Əlillər Cəmiyyəti" İB Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə yardımı ilə "Qaçqın, məcburi köçkün, müharibə veteranları, əlil və sağlamlıq imkanları məhdud olan şəxslərin, məhbusların və ailə üzvlərinin problemlərinin həllinə dəstək" adlı layihə həyata keçirir.

Layihə çərçivəsində ömürünün 40 ilini pedaqoji fəaliyyətə həsr etmiş 90 yaşlı Əsədova Bikə Oruc qızı "Beynəlxalq Əlillər Cəmiyyəti"nə rəsmi müraciət etmişdir. Bikə xanımın oğlu Ağdam rayonu özünümüdafiə batalyonunun əsgəri olmuş Yalçın Əsədov məlum Xocalı faciəsi zamanı ermənilər tərəfindən əsir götürülmüş və başı kəsilmişdir. Bikə xanım hazırda Bakı şəhərində kirayədə yaşayır.

İctimai Birliyin üzvləri Bikə Əsədovanın evində olmuş, problemləri, mənzil şəraiti ilə yerindəcə maraqlanmışlar. Bundan sonra şəhid anasının problemlərinin həlli üçün Əmək və Əhalinin Sosial Müdafiəsi Nazirliyinə müraciət edilmişdir. Qısa zaman ərzində nazir cənab Sahil Babayev İB-in sədri Tahir Xudiyevi və şəhid anası Bikə Əsədovanı qəbul edərək problemlərini dinləmiş və qanun çərçivəsində lazımi köməklik göstəriləcəyini bildirmişdir.