Bu gün “Beynəlxalq Əlillər Cəmiyyəti” İctimai Birliyi və “Əlillər Dünyası” qəzeti “Xəzər” Universitetinin təşəbbüsü ilə birgə Universitetin binasında Gül bayramı münasibətilə İctimai Birliyin üzvü, 1-ci qrup əlil Ümid Cümşüdovun əl işlərindən ibarət böyük bir satış-sərgi təşkil edilmişdir. Sərgidə Ümidin dekorativ sənəti üzrə muncuq və təbii bitkilərlə işlədiyi müxtəlif mövzularda, ən çox da güllərə, çiçəklərə həsr edilmiş 10-larla əsərləri nümayiş olunmuşdur. Sərgi tələbələr tərəfindən böyük maraqla qarşılanmışdır. Universitetin rektoru Hamlet İsaxanlı özünün “Ziyarət” adlı şerlər kitabını Ümidə hədiyyə etmiş, ona böyük uğurlar arzulamışdır. Hamlet müəllimlə söhbətimiz zamanı o bildirmişdir ki, bu tədbirin Universitetin əməkdaşı Nana xanım Kələntərlinin böyük zəhməti olmuşdur. Sədr Tahir Xudiyevlə birgə İctimai Birliyin 50-yə yaxın üzvü, Universitetin tələbə və müəllim heyəti sərgiyə tamaşa etmişdir. Tədbir Universitetin tələbələrinin ifasında musiqili-bədii hissə ilə başa çatmışdır. Sərgidə ümidin bir çox əsəri də satılmışdır.

Nəzərinizə çatdırmaq istəyirik ki, bu Ümidin ilk sərgisi deyil. Bundan əvvəl 2011-ci ildə Tahir Xudiyev müqəddəs Qurban bayramı münasibətilə Ədliyyə nazirinin müavini, nazirliyin penitensiar xidmətinin rəisi, general-mayor cənab Mədət Quliyevin razılığı ilə PX-nın Baş İdarəsi Tərbiyə İşinin Təşkili İdarəsinin rəis müavini, ədliyyə polkovnik-leytenantı İntiqam Əliyev və Tərbiyə İşinin Təşkili İdarəsinin böyük inspektoru, ədliyyə mayoru Natəvan xanım Tahirovanın təşkilatçılığı ilə 11 saylı Cəzaçəkmə Müəssisəsində Ümidin əl işlərindən ibarət sərgi təşkil edilmişdi. Sərgi məhbuslar tərəfindən böyük maraqla izlənmiş və onların sevincinə səbəb olmuşdur. Məhbuslar öz əl işləri olan nərd taxtasını Ümidə hədiyyə etmişlər.
Qeyd etmək istəyirik ki, Ümidin daha bir sərgisini Bakıda keçiriləcək “Evrovision-2012” Mahnı müsabiqəsi zamanı Milli Parkda keçirmək də nəzərdə tutulub.