Məlumat verdiyimiz kimi, Azərbaycan Respublikasının QHT-lərə Dövlət Dəstəyi Agentliyinin maliyyə dəstəyi ilə “Beynəlxalq Əlillər Cəmiyyəti" İB  (BƏC İB) "Həssas sosial qruplara aid vətəndaşlar üçün tibbi, hüquqi və psixoloji xidmətlərin təşkili" adlı layihə həyata keçirir.

Bu gün “SƏS” İnformasiya Agentliyində BƏC İB layihənin gedişinə və layihə zamanı nəşr edilmiş “İmtiyazlı şəxslər üçün məlumat kitabı”nın təqdimatına həsr edilmiş Mətbuat Konfransı keçirdi. Əvvəlcə tədbir iştirakçıları 1918-ci ilin 30 mart və 3 aprel tarixləri arasında Bakı şəhərində və respublikamızın digər ərazilərində Bakı Soveti və sovet-rus imperiyası ordusu tərkibində Daşnaksütundan olan erməni silahlı dəstələrinin azərbaycanlılara qarşı törətdikləri soyqırımı zamanı qətlə yetirilənlərin xatirəsini 1 dəqiqəlik sükutla yad etdilər.

Sədr və layihə rəhbəri Tahir Xudiyev çıxış edərək bildirdi ki, layihənin  icrası zamanı bütün kateqoriyadan olan əlilliyi olan şəxslər, Azərbaycanın ərazi bütövlüyü uğrunda döyüşüb əlil olmuş şəxslər və döyüşçülər, şəhid ailələri və Milli Qəhrəman ailələri, məcburi köçkünlər, həmçinin əlilliyi olan məhbusların və onların ailə üzvlərinin tibbi-sosial, hüquqi, psixoloji problemləri öyrənilir, həlli istiqamətində işlər aparılır, onlara psixoloji xidmət göstərilir, eləcə də onlarla maarifləndirmə işləri aparılır. İndiyədək 10-larla insanlara köməklik göstərilib, onların problemləri ilə bağlı aidiyyəti dövlət təşklatlarına müraciətlər olunub, problemləri ictimailəşdirilib.

Tədbirdə iştirak edən Azərbaycan Xalq Yazıçısı, BƏC İB-in Fəxri üzvü Çingiz Abdullayev imtiyazlı şəxslərə dövlət qayğısından, eləcə də YAŞAT Fondunun Şəhid ailələri və Qarabağ müharibəsi iştirakçıları, qaziləri üçün gördüyü işlərdən danışıb.

            Layihə zamanı BƏC İB-ə müraciət edən, həyat yoldaşı və oğlu Qarabağ müharibəsində şəhid olan Səyyarə Nəcəfova, Milli Qəhrəman Asif Məhərrəmovun oğlu Azər Məhərrəmov da tədbrdə çıxış etdilər. BƏC İB-in İdarə Heyəti üzvü, AzTV-nin redaktoru Zərnişan Azayeva bildirdi ki, hər iki ailənin mənzil məsələsi iə bağlı aidiyyəti dövlət təşkilatlarına müraciət edilib.

            Qaçqınların və Məcburi Köçkünlərin İşləri üzrə Dövlət Komitəsinin əməkdaşı İsa İsmayılov, Əmək və Əhalinin Sosial Müdafiəsi Nazirliyinin əməkdaşı Rüfanə Əhmədova, təqaüddə olan hüquq müşaviri, BƏC İB Hüquq şöbəsinin rəhbəri Əlabbas Quliyev, Ağsaqqallar Şurasının üzvü Dilsuz İsmayılov, İdarə Heyəti üzvü Sabir Musayev, AR Ailə, Qadın və Uşaq Problemləri üzrə Dövlət Komitəsinin əməkdaşı Rafiq Mahmudov, Azərbaycan Coriyo Kunq-Fu Federasiyasının prezidenti Davud Mahmudzadə, BƏC İB-in Naxçıvan MR üzrə Nümayəndəliyinin rəhbəri çıxış edərək layihənin əhəmiyyətindən danışdılar. Bundan başqa layihə çərçivəsində nəşr edilmiş “İmtiyazlı şəxslər üçün məlumat kitabı” da iştirakçılara paylandı.

Sonda İdarə Heyəti üzvü, Qarabağ Regionu üzrə Nümayəndəliyin rəhbəri, “Türk Dünyası Turan Düşüncə Mərkəzi” İB-in İdarə Heyəti üzvü, layihənin eksperti Qarabağ müharibəsi veteranı Həsənağa Bayramov çıxış edərək bildirdi ki, məqsədimiz imtiyazlı şəxslərin problemlərini ictimailəşdirməklə yanaşı onların aidiyyəti dövlət təşkilatları vasitəsi iə müsbət həllinə nail olmaqdır.

             Tədbirdə AR Diasporla İş ürə Dövlət Komitəsi, Rəqəmsal İnkişaf və Nəqliyyat Nazirliyi, Dini Qurumlarla iş üzrə Dövlət Komitəsinin, ƏN Penitensiar Xidmətinin əməkdaşları, KİV və ictimaiyyət nümayəndələri də iştirak edirdilər.