“Beynəlxalq Əlillər Cəmiyyəti” İctimai Birliyi qarşıdan gələn 3 dekabr-Beynəlxalq Əlillər Günü münasibətilə silsilə tədbirlər həyata keçirir. Bu məqsədlə İB-in sədri Tahir Xudiyev istedadlı əlil üzvlərinin problemlərinin həlli ilə bağlı Təhsil naziri cənab Misir Mərdanova müraciət etmişdir. Təhsil Nazirliyinin De- İnstitutlaşma və Uşaqların Müdafiəsi İdarəsinin şöbə müdiri Həbib Kərimov İB-in ofisində olmuş, onların problemləri ilə maraqlanmışdır.
İB-in üzvü 1995-ci il təvəllüdlü, 1-ci qrup əlil Cümşüdov Ümid Fərhad oğlu dekorativ incəsənət üzrə əl işlərinin müəllifidir. O, 2 ildir ki, T.İsmayılov adına Uşaq Yaradılcılıq Mərkəzində məşğul olur. Ümidin hərəkət qabiliyyəti məhdud olduğu üçün o, Mərkəz tərəfindən evdə fərdi təhsil almaq istədiyini, eyni zamanda fərdi satış-sərgisinin təşkil olunmasına köməklik göstərilməsini xahiş etdi. 1989-cu il təvəllüdlü Nəcəfzadə Vasif Şahin oğlu rəssamdır. O, xaricdə təhsil almaq istədiyini bildirdi. Hər iki rəssam həm də emalatxana ilə təmin olunmaq istəklərini Həbib müəllimə çatdırdılar. 1-ci qrup əlil Sadıxov Murad Sadıx oğlu (Murad Sadıx) isə müğənnidir. 1990-cı il təvəllüdlüdür. Murad 6-cı sinfi bitirdikdən sonra xəstəliyi ilə əlaqədar olaraq təhsil almayıb. Lakin buna baxmayaraq, çox istedadlı və intellektual səviyyəli bir gəncdir. Murad Sadıx yarımçıq qalmış fərdi təhsilini davam etdirmək və səsli kompyuter arzusunda olduğunu bildirdi. İB-in digər bir üzvü 1995-ci il təvəllüdlü Ağayeva Nərmin Elçin qızı isə anadangəlmə lal-kardır. O, bu günədək heç bir təhsil almayıb. O, həm də serebral iflic xəstəsidir. Odur ki, Nərminin evdə fərdi təhsil almaq istəyini babası Rafiq Ələsgərov bildirdi.
Həbib Kərimov problemlərlə tanış olmuş, bu barədə təhsil naziri cənab Misir Mərdanova məlumat verəcəyini bildirmişdir. Yaxın gələcəkdə qanun çərçivəsində bu problemlərin müsbət həlli ilə məşğul olacaqlarını bildirmişdir. Hətta yerindəcə Nərmin Ağayevanın təhsili ilə bağlı məsələnin həlli üçün bir neçə dövlət müəssisəsi ilə əlaqə saxlamışdır.
Görüşdə həmçinin valideynlər və İB-in Novxanı kənd Nümayəndəliyinin sədri Lalə Abuzərova da iştirak etmişlər.