Azərbaycan Respublikası Ədliyyə Nazirliyinin Penitensiar Xidməti ilə “Beynəlxalq Əlillər Dünyası” İctimai Birliyi arasında “Cəza çəkən əlil insanların problemlərinin həlli istiqamətində beynəlxalq təcrübənin tətbiq edilməsi, bu sahədə müvafiq maarifləndirmə işinin aparılması və cəmiyyətə inteqrasiya olunmalarında köməklik göstərilməsi məqsədilə keçiriləcək seminar-treninqlərə dair” 10 mart 2011-ci il tarixində Tədbirlər Planı imzalanmışdır.
Tədbirlər Planına müvafiq olaraq 05.07.2011-ci il tarixində ƏN PX-nin 7 saylı Cəzaçəkmə Müəssisəsində cəzaçəkən müxtəlif qruplu əlilliyi olan məhkumlarla “Əlilliyi olan məhkumların sosial reabilitasiyasının həyata keçirilməsi qaydaları” mövzusunda görüş keçirilmişdir.
Tədbirdə 35 nəfər əlilliyi olan, 30 nəfər isə səhhətində problemi olan məhkumlar, PX-nın Baş İdarəsi Tərbiyə İşinin Təşkili İdarəsinin böyük inspektoru, ədliyyə mayoru Natəvan Tahirova, “Beynəlxalq Əlillər Dünyası” İctimai Birliyinin sədri Tahir Xudiyev, Birliyin hüquqşünasları Səhəddin Cəfərov, Rəhim Quliyev, 16 saylı CM-nın tərbiyə işinin təşkili üzrə rəis müavini, ədliyyə mayoru Vüqar Orucov və dəstə rəisləri iştirak etmişlər.
Tədbirdə mövzu ilə əlaqədar Tahir Xudiyev, Natəvan Tahirova, Səhəddin Cəfərov, Rəhim Quliyev məruzə ilə çıxış etmişlər.
Sonra mövzu ilə əlaqədar əlil məhkumlarla müzakirələr aparılmışdır. Müzakirələr zamanı əlil məhkumları maraqlandıran suallar, onların irəli sürdükləri problem və çətinliklər dinlənilmiş və həmin problem və çətinliklərin mövcud qanunvericilik çərçivəsində həlli barədə onlarla maarifləndirmə işləri aparılmışdır.
Əlil-məhkumlar çıxış edərək bu tədbirdən məmnun qaldıqlarını bildirmişlər.
Tədbirlər Planına müvafiq olaraq, bu səpkidə tədbirlər ƏN PX ilə mütəmadi olaraq davam etdiriləcək və əlil məhkumlarla bağlı müəyyən problem və çətinliklər ictimai nəzarətə götürüləcəkdir.