3 oktyabr 2011-ci il tarixində Heydər Əliyev Sarayında “Beynəlxalq Əlillər Cəmiyyəti” İctimai Birliyinin Mədəniyyət və İncəsənət Şöbəsinin rəhbəri, anadangəlmə xəstəliyi ilə əlaqədar 1-ci qrup əlil, müğənni Murad Sadıxın “Oxuyuram yaşamaq üçün, yaşayıram oxumaq üçün” adlı solo konserti keçirildi. Elə ilk mahnısı ilə hamını özünə heyran edən müğənni Murad Sadıx gözəl Azərbaycan mahnıları ilə yanaşı, məşhur rus müğənnisi Aleksandr Serovun mahnılarını da yüksək səviyyədə, məharətlə ifa etdi. Konsertin aparıcısı məşhur və sevilən müğənni, Azərbaycan Respublikasının Əməkdar Artisti Tünzalə Ağayeva idi.
Murad Sadıx öz məlahətli səsi ilə Azərbaycanı xarici ölkələrdə uğurla təmsil etmiş, keçirilən müsabiqələrdə mükafatlara layiq görülmüşdür. O, hətta Moskvada keçirilən yaradıcı əlillərin III Beynəlxalq festivalında “Qran-Pri” mükafatına da layiq görülmüşdür.
Beynəlxalq Əlillər Cəmiyyəti” İctimai Birliyinin İsveçdəki Nümayəndəliyinin rəhbəri Tahir Əsədullayev yaxın gələcəkdə İsveçdə Murad Sadıxın konsertini və Azərbaycanlı əlil rəssamların əl işlərindən ibarət sərgi təşkil etmək istiqamətində işlər aparır.
“Beynəlxalq Əlillər Cəmiyyəti” İctimai Birliyi 600 nəfər əlil və imkansız ailənin üzvlərinin həmin konserti birbaşa Sarayda izləməsinə şərait yaratdığı üçün başda direktor cənab Fərhad Babayev olmaqla Sarayın bütün əməkdaşlarına təşəkkürünü bildirir.
Onu da qeyd etmək istəyirik ki, cənab Fərhad Babayev dəfələrlə təmənnasız olaraq Birliyimizin üzvlərinə Sarayda keçirilən bir çox konsertləri izləmək üçün şərait yaratmışdır.