Məlum olduğu kimi, yanvar ayının 27-də İrandakı Azərbaycan səfirliyinə qarşı törədilən terror zamanı səfirliyin Mühafizə Xidmətinin rəisi baş leytenant Əsgərov Orxan Rizvan oğlu qətlə yetirilmiş, iki nəfər isə yaralanmışdır.

Orxan Əsgərovun cənazəsi Bakıya gətirilmiş, ailəsinin yaşadığı Yeni Yasamaldakı evində onunla vida mərasimi təşkil edilmiş və fəxri qaravul dəstəsinin müşaiyəti ilə II Şəhidlər Xiyabanında dəfn edilmişdir.

Azərbaycan Respublikası Prezidentinin köməkçisi Hikmət Hacıyev və Xarici işlər naziri Ceyhun Bayramov şəhid Orxan Əsgərovun yas mərasimində iştirak etmiş və Prezident İlham Əliyevin başsağlığını Şəhidimizin  ailəsinə çatdırmışlar.

Türkiyə Cümhuriyyətinin Azərbaycandakı səfiri Cahit Bagçi və səfirliyin digər əməkdaşları da Orxan Əsgərovun yas mərasimində iştirak etmiş, ailəsinə və doğmalarına başsağlığı vermişlər.

Orxan Əsgərov 1986-cı ildə Gəncə şəhərində anadan olmuş, 2003-cü ildə Sumqayıt Şəhər Nizami Gəncəvi adına Texniki və Təbiət Elmləri Liseyini bitirmişdir.

Ailəli idi. İki övladı yadigar qaldı.

“Beynəlxalq Əlillər Cəmiyyəti” İB və “Türk Dünyası Turan Düşüncə Mərkəzi” İB-in sədri Tahir Xudiyev də mərhumun cənazəsinin qarşılanmasında, onunla vida mərasimində və dəfnində iştirak etmişdir.

“Beynəlxalq Əlillər Cəmiyyəti” İB, “Türk Dünyası Turan Düşüncə Mərkəzi” İB-in sədri Tahir Xudiyev, “Kür-Xəzər” Xeyriyyə İctimai Birliyinin sədri Akif Kərimov, eləcə də “Əlillər Dünyası” qəzetinin bütün kollektivi adından şəhid baş leytenant Orxan Əsgərovun atası Rizvan Əsgərova, əmisi Mövlan Əsgərova, yaxın qohumu Elxan Mehdiyevə  və digər ailə üzvlərinə dərin hüznlə başsağlığı veririk.

Allah rəhmət eləsin.

Məlahət Abdullayeva

“Əlillər Dünyası” qəzetindən

30.01.2023